धनगढी । प्रधानमन्त्री पुष्पकमल दाहाल प्रचण्डले अहिलेको सत्ता गठबन्धन पाँच बर्ष कायम रहने दाबी गरेका छन् । धनगढीमा सोमबार आयोजित समाजवादी मोर्चा नेपालको सन्देश सभामा बोल्दै नेकपा माओवादी केन्द्रका अध्यक्ष समेत रहेका प्रधानमन्त्री प्रचण्डले एमालेले गठबन्धन विरुद्ध चलखेल गरे पनि यसलाई कसैले पनि हल्लाउन नसक्ने बताए ।
उनले कोसीमा बनेको तीन गठबन्धनको समस्यालाई कसरी समाधान खोज्ने भनेर काँग्रेसका सभापति शेरबहादुर देउवा,डा. शेखर कोइराला र आफू बसेर यो गठबन्धनलाई कमजोर पार्न दिइने छैन भन्ने प्रतिबद्धता पत्रमा हस्ताक्षर गरिएको बताए । उनले गठबन्धन विरुद्ध एमालेले कोसीमा एकपछि अर्को चलखेल गरिरहेको बताए ।
एमालेले गरेको चलखेल रोकिएको भनेको त फेरी अर्को चलखेल,हामीले काँग्रेसको एक जनाको मन्त्री बनाउने भनेकोमा एमालेको मन्त्री थपिएको बताउँदै यसलाई सच्याएर पाँच वर्ष यो गठबन्धन कायम राख्ने बताए । विभिन्न नाममा परिवर्तनका उपलब्धिलाई उल्ट्याउन भइरहेको षडयन्त्रलाई परास्त गर्न जरुरी रहेको उनको भनाइ थियो ।
सभामा नेकपा एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपाल, जनता समाजवादी पार्टीकाअध्यक्ष एवं पूर्व उपप्रधानमन्त्री उपेन्द्र यादव,नेत्र विक्रम चन्द लगायतले धारणा राखेका थिए
